Chanson médiévale de troubadours, France. Auteur inconnu (XIIIe siècle).

1.
Souvent souspire mon cuer plein d’ire
pour la plus bele de l’enpire.
Si me martire que ne l’os dire.
Souvent mi fet plorer et rire.
Ele mi set bien escondire
et moi seur touz autres despire.
Descrire en cire ne porroit nus son cors ne lire.
Ocire defrire mi fet quant la remire.

2.
Dex s’or povoie tenir la voie
Par quoi j’eusse de li joie.
Assez auroie plus ne querroie
Tant ne desir dras ne mouroie.
Douz Dex s’amor tant mi guerroie
Quant el ne veut que je sein soie
Le foie mi noie plus ai dolor que cil de Troie
Ne croie que noie le jor que sire en soie

3.
Tant ai servi e ma douce amie
Bien croi que j’en perdrai la vie.
Quant de la prie el me dit vie:
‘Fui de ci gars ke ne t’aim mie.’
Douz Dex s’amor mi contralie
qui en mon cuer s’est encormie.
N’est mie en vie
Qui m’en poist donner aie.
M’amie ma vie de vous ai grant envie

4.
Ele se paine de metre en paine
moi toste longue la semaine.
Si me demaine com sien demaine;
plus est fiere que castelaine.
onques ne fu si bele Elaine
ne n’ot onques si douce alaine.
Estraine de paine mi fet neis au diemaine.
Vilaine n’a vaine qui d’orgueil ne soir plaine.

5.
De m’amie m’estuet retrere
Quant veil que je ne li pluis plere
Ele est tant douce et debonaire
Qu’el ne porroit a nul desplere.
Dex porquoi m’est el si contrere
Qu’e ne prise riens mon afere ?
Atrere la here m’estuet quant je ne li puis plere
Retrer me fere m’estuet de son repere.

Source: Thibaut IV, « Recueil de chansons du XIIIe siècle, avec musique notée »
https://gallica.bnf.fr/ark:/12148/btv1b550063912/f360.item.zoom