Virelai médiéval, France. Tiré du Manuscrit de Montpellier.

(Ch.)
E dame jolie,
Mon cuer sans fauceir
Met an vostre bailie
Ke ne sai vo peir

1.
Sovant me voix conplaignant
Et an mon cuer dolosant
D'une malaidie
Dont tous li mons an amant
Doit avoir le cuer joiant
Cui teilz malz maistrie
Si formant m'agrie
Li dous malz d'ameir
Ke par sa signorie
Me covient chanteir
(Ch.)

2.
J'ain de cuer an desirant
Dou monde la mués vaillant
Et la plus prixie;
Plus saige ne mués parlant
N'a honor mués antandant
On mont ne cuit mie.
Ne sai ke j'an die,
Mais a droit loweir
C'est la muez ensaignie
C'on puxe trover.
(Ch.)

3.
Bien sai ke fellon cuxant
M'ont estei souvant nuxant
Ver vostre partie.
Tres douce dame a cors gent,
Por Deu ne's croiez pas tant,
Ces gens plain d'anvie.  
Si formant m'agrie
Li dous malz d'ameir
Ke par sa signorie
Me covient chanteir
(Ch.)