276. Seignor, sachiez, qui or ne s’en ira
Chant de croisades, France. Attribué à Thibaut de CHAMPAGNE (1201-1253).
1.
Seignor, sachiez, qui or ne s’en ira
en cele terre ou Diex fu mors et vis
et qui la croiz d’outremer ne penra
a painnes mais ira en paradis.
Qui a en soi pitié ne remembrance,
au Haut Seignor doit querre sa vanjance
et delivrer sa terre et son païs.
2.
Tuit li mauvais demorront par deça
qui n’ainment Dieu, bien ne honor ne pris;
et chascuns dit: "ma fame que fera?
je ne lairoie a nul fuer mes amis".
Cil sont cheoit en trop fole atendance,
qu’il n’est amis fors que Cil, sanz doutance,
qui por nos fu en la vraie croiz mis.
3.
Or s’an iront cil vaillant bacheler
qui ainment Dieu et l’onour de cest mont,
qui sagement vuelent a Dieu aler;
et li morveus, li cendreus demorront:
avugle sont, de ce ne dout je mie.
Qui i secors ne fait Dieu en sa vie
et por si po pert la gloire del mont.
4.
Diex se laissa por nos en croiz pener
et nos dira au jor ou tuit vanront:
"Vos qui ma croiz m’aidastes a porter,
vos en irez là ou mi angle sont:
là me verroiz et ma mere Marie;
et vos par cui je n’oi onques aïe
descendrez tuit en enfer le parfont".
5.
Chascuns cuide demorer touz haitiez
et que jamais ne doie mal avoir;
ainsi les tient Anemis et pechiez
que il n’ont sens, hardement ne pooir.
Biax sire Diex, ostez leur tel pensee,
et nos metez en la vostre contree
si saintement que vos puissons veoir.
6.
Douce Dame, roïne coronee
priez por nos, vierge bone eüree,
et puis aprés ne nos puet mescheoir.
